Rockin Your Fuckin Socks Off

Flutt

2006-10-30T20:30:00.000Z

Jæja, þá ætla ég að flytja einu sinni enn. Þó mér líki alveg hrikalega vel við lúkkið á þessu bloggi þá er blogger svolítið leiðinlegur við að eiga og því ætla ég að fara yfir til hans Baldurs míns...

Kíkið á mig http://rocksock.bloggar.is/

Blurgh

2006-10-29T18:43:00.000Z

Kveldið.

Óskaplega er ég löt í dag. Ég er ekkert búin að gera nema sofa, knúsa púkann minn og hanga í tölvunni. Já, og setja í þvottavél, sem er meðal leiðinlegustu heimilisstarfa í heiminum! ... (kannski því ég þarf að ganga upp og niður tvær hæðir). Ef ég ætti að setja niður svona "Topp 5 leiðinlegustu heimilisstörfin" þar sem nr. 1 væri það allra leiðinlegasta, þá liti sá listi svona út:

1 Brjóta saman þvott
2 Skipta á rúmum
3 Setja í uppþvottavél
4 Setja í þvottavél
5 Strauja

Mér þykir hins vegar ekkert svo leiðinlegt að taka til og ryksuga, en það er víst ekki á allt kosið.

Við skelltum okkur á Langa í gærkvöld og hlýddum á tónleika (sjá á síðu Langa Manga) og voru þeir nokkuð magnaðir. Svo var bara hefðbundið djamm á eftir sem var barasta ágætt.

Hvað er eiginlega málið með svona seinnipartsþynnku? Ég er sjaldnast þunn þegar ég vakna en yfirleitt hellist yfir mig alveg skelfilega pirrandi þynnka svona í kringum kvöldmat. Þetta er algjörlega óháð því hvað/hvort ég borða eða drekk eða hve lengi ég sef. Þetta er bara svona, en hver ætli skýringin sé? Ó vell...

Bleble.

Still here...

2006-10-16T15:11:00.000Z

Ég er hérna enn; fór bara í fýlu því blogger virkaði ekki í að því er virtist óendanlega langan tíma. Hann er samt örugglega löngu farinn að virka.

Ekkert að frétta sosem. Fer á Selfoss á fimmtudag og kem aftur á laugardag. Við kerlurnar á Eyró erum að fara á Hjallaráðstefnu sem verður án efa mjög gagnleg og skemmtileg.

Ööö... já.

Systir

2006-09-07T11:21:00.000Z

-*-

Aumrar telpu táraflóð
telur ljóð.
Særir eigið systurblóð,
systir góð.

-*-

Theres your sign...

2006-07-19T15:28:00.000Z

"Hva, ertu að loka"?

"Nei, nei. Eftir kl 23 er það bara stefnan að hafa alltaf ljósin skrúfuð í botn og enga tónlist. Já svo geymum við yfirleitt stólana uppi á borðunum. Viðskiptavinirnir stóla svo sjálfir niður þar sem þeir vilja sitja."

Whut?

2006-07-13T01:53:00.000Z

Hvað er að blogger núna? Það er eins og template-ið hafi bara hætt að virka. Djefuls rugl.

Expirimentamundo

2006-07-12T02:15:00.000Z

Yes, I like to expiriment. With my hair... and ways of beating men to a psychological pulp.

Fnje fnje!

Hóst...

2006-07-10T01:28:00.000Z

Ég fór á bílnum mínum og elti sólarlagið alla leið út á Arnarnes. Það er bara svo fallegt, alveg þess virði að elta það. Ég sé dreggjarnar af því út um svefnherbergisgluggann minn, í gegnum gardínurnar þar sem það ber við svalirnar á blokkinni á móti, alveg jafn brennandi rautt og það var áðan. Það er alveg svakalega langt síðan ég hef getað notið þess almennilega, gefið mér tíma til að njóta þess. Það gefur mér einhverja orku að sitja alein og stara inn í logandi sólina og elta hana með augunum ofan í hafið.
Sá vankantur er þó á að þegar eldsneytið, orkan, streymir inn, þá kemur útblásturinn. Þykkur reykur af einhverskonar tilfinningaróti, örlítið tregablandinn og kæfandi. Út fer hann þó og ég get ekki beint sagt að hann sé óþægilegur fylgikvilli alls þessa, þó svo ég hafi sagt hann vankant. Þetta eru víst hlutir sem ekki er gott að byrgja inni til lengdar. Það er kannski þversögn, en ég sé aldrei betur inn í sjálfa mig heldur en í nákvæmlega þessari reykjarsvælu.

Bad Seed

2006-06-29T15:27:00.000Z

Ég á líka miða á tónleika

....

MEÐ NICK CAVE!!!

Gramsilibams

2006-06-16T14:59:00.000Z

Við Linda ætlum að skreppa saman út í Bolungarvík og gramsa í búðum.

Hver fer út í Bolungarvík nema viðkomandi búi þar eða þurfi þess ellegar fá holdsveiki, einhverskonar innkirtlasýki eða taugaveikibróður (það er til!)... jafnvel berkla? Ekki ég a.m.k.

En nú verður farin bæjarferð í Víkina, allir með!

Maskínanana...

2006-06-06T22:35:00.000Z

Hljóð dagsins - Eðal kántrí í Rokklandi á rás 2

Kveldið...

Fer allt alltaf aftur í sama farið? Kannski það bara. Stundum er það voðalega þreytt, stundum er það pínulítið dapurlegt... en stundum er það bara ágætlega notalegt. O sei sei, o já.

Ég ætlaði að fara að sauma en maskínan er ekki alveg á því að gera það sem til er ætlast af henni. Þetta er voðalega tæknileg saumavél, tölvustýrð og ég veit ekki hvað og hvað. Maður skyldi ætla að hún gæti þá sleppt því að hnoða tvinnanum af spólunni í einn vöndul á neðanverðu efninu. Pirrandi. Samt svolítið fyndið. Minnti mig á handavinnutíma í gamla daga þegar ein skólasaumavélin gerði slíkt hið sama og strákurinn sem sat við hana hafði ekki hugmynd um það. Held hann hafi klárað af heilli spólu á svona 10 cm langan efnisbút og var svo í lengri tíma að rekja herlegheitin upp. O sei sei, o já. Ég kann ekkert á saumavélar með gervigreind eða hvað það nú er svo ég slökkti bara á henni og vona að hún verði í lagi þegar ég kveiki aftur.

Hugsa bara smá á meðan...

Píanósnillingur... höhömm

2006-05-12T11:02:00.000Z

Gamla konan ég var að taka grunnstig á píanó! Það samsvarar þriðja stigi samkvæmt gömlu námsskránni. Bea sagði að ég væri hetja... og ég barasta held að það sé rétt hjá henni.

Svona gamalt fólk eins og ég ætti ekki að vesenast í svona hlutum.

Öss...

Gleðilega páska

2006-04-18T10:50:00.000Z

Hugleiðing helgarinnar - dónaskapur virkar ekki.

Nenni ekki að blogga - allt við það sama, kreisí vinna, gott djamm, voða gaman. Er með tölvuofnæmi þessa dagana. Það læknast eflaust, en þangað til...

sjá'st!

Undir rós í dverghendu

2006-03-28T01:43:00.000Z

-*-

Klessu- viltu -keyra mig?
Komd'í spark!
Er ökustaurinn þreytir þig;
þrykktu' í park!

-*-

Þurfalingur

2006-03-24T13:17:00.000Z

Sælinú!

Ég hef ekki nennt að blogga, enda sosem ekki mikið að frétta. Fór suður með Þráinn til læknis og vonandi fer þetta magavesen nú að lagast. Tveir mánuðir á lyfjum og sjá svo til.
Áðan fór ég í umboð almannatrygginga til að fá endurgreiddan ferðakostnað. Það kostaði nú "skitinn" 32 þúsund kall að fljúga. Ég var búin að fara áður en þá vantaði mig víst eitt vottorð í viðbót. Óttaleg skriffinska í kringum svona lagað. Ég var eiginlega búin að gleyma því. Þessu stóð maður nú í í fleiri mánuði þegar strákurinn var lítill. Allskonar bætur og endurgreiðslur og niðurgreiðslur sem maður átti víst rétt á. Hví er ekki bara hægt að senda manni þetta í pósti? Það er svo mikið vesen að bera sig eftir þessu. Fólkið sem á móti manni tekur er líka svo oft stirt í samskiptum, líkt og maður sé að ræna það þess eigin framfærsluaurum. Manni líður eins og aumingja að væla um ölmusu.

-*-

Þurfalingar þessir eru ljótir!
Hingað snöggvast, handlangið
haglarann minn, fljótir!

-*-

Góðar stundir.

Vikhendumst

2006-03-20T02:05:00.000Z

Fullkominn

-*-

Ljós hann var og ljúfari en flestir.
Augun bláu unaðsleg.
Engir voru lestir.

Sítt var hárið silkimjúkt og liðað.
Allar lífsins áhyggjur,
aðeins hann gat friðað.

Nætur dimmar nutumst við í leynum.
Saman runnu sálirnar,
sögðum ekki neinum.

-*-

Fallegur og friðsæll hvílir drengur.
Enga framar elskar mey,
né andann dregur lengur.

-*-

Niðurdrepandi braghenda á föstudegi

2006-03-10T12:12:00.000Z

-*-

Örg og bitur engist, hjartað órótt, lítið.
Þín er kvölin, þitt er valið,
þitt að temja hjartað kvalið.

-*-

Salat, alat, lat, at, tttaahhhhhh!

2006-03-08T13:11:00.000Z

Hvurslags óttaleg lágdeyða er þetta? Skellum bara inn uppskriftum.

Laxasalat a la RockSock

100 gr. sýrður rjómi
30 gr. létt majones (ca. 6 tsk)
2 tsk Knorr Hvítlauksdressing mix
Aromat
Laukduft
Knorr Grönsaks krydd
120 gr. lax, soðinn eða ofnbakaður og kældur
50 gr. laukur
50 gr. iceberg
100 gr. rauð paprika
100 gr. gúrka

Sýrðum rjóma, majonesi og kryddi er hrært saman. Grænmetið saxað mjög fínt og blandað saman við, loks er laxinn rifinn smátt og settur út í. Geymt í kæli í svona 20 mín (dressingmix blandan þarf aðeins að bíða) og borðað svo með brauði eða hrökkbrauði.

Kartöflusalat a la RockSock

100 gr. sýrður rjómi
30 gr. létt majones
Aromat
Lauk- og hvítlauksduft
100 gr. kartöflur

Grænmeti samtals 300 gr.:
Sveppir
paprika
sellerí
zuccini

Sýrður, majones og krydd hrært saman. Grænmetið (sem er búið að svissa á pönnu og kæla) blandað við og svo kaldar kartöflurnar (soðnar... tjah nema þið fílið hráar kartöflur) skornar í teninga og settar út í. Ossalega fljótlegt. Ég notaði grænmeti og kartöflur sem voru í afgang síðan kvöldið áður. Æðislegt með brauði eða hrökkbrauði.

Það tók mig ca. 50 mínútur að skrifa þetta því Sigga hélt mér á snatti og ég hló svo mikið að ég lamaðist tímabundið. En gjessovel.

Þyngsl

2006-03-02T18:08:00.000Z

Jæja, nú ætla ég alveg hreint að drepa ykkur lifandi, eflaust þó bara úr leiðindum. En hvað um það, þið lesið hvort sem ykkur líkar betur eða verr!

-*-

Langferð

Hljóður áfram húmið klýfur,
hraðar skríður, nálgast brátt.
Öskrandi og áköf rífur
óvæg þögnin ró og sátt.

Þögull inn í sortann svífur,
sáran blæðir táragátt.
Örvæntingin áfram drífur,
undir niðar malbik grátt.

Uppgefinn við stýrið stífur,
starir kalt þó eygi fátt.
Hjartað veika þjáning þrífur,
þurreys sálar allan mátt.

Morgunroðinn margan hrífur,
en mæddan sem að þráir nátt,
ferðalangs, sem feigðarhnífur
flær og deyðir holdið þrátt.

-*-

Maddý

2006-03-01T14:05:00.000Z

Í dag hefði Maddý systir orðið fertug. Ég er viss um að hún væri falleg og yndisleg í dag eins og hún var þá. Hún ætti líka eflaust fullt af börnum!

Hún var alltaf svo blíð og góð við mig, kallaði mig litluna sína og var alltaf að lykta af hárinu mínu. Þó ég hafi verið voða lítil þegar hún dó þá man ég ennþá eftir henni. Ég man að hún sat alltaf á sama stað í eldhúsinu á Hringbrautinni og hvíldi olnbogann á eldhúsbekknum. Ég man líka að hún kenndi mér að skrifa nafnið mitt í grænan leir á stofuborðinu. Góðar minningar.

Margrét Helga Þráinsdóttir
Fædd 1. mars 1966, dáin 23. desember 1984.

Brosi til hennar í dag.

Bögubósa-blogg

2006-02-27T00:39:00.000Z

Sælinú.

Ágætt að frétta héðan, allt við það sama sosem. Allir nokkuð hressir, þvotturinn ennþá viðurstyggilega leiðinlegt húsverk... og svo framvegis. Batman flutti inn á föstudagskvöldið og hefur verið hér alla helgina. Ég sé ekki fram á að hann fari í bráð.

Ég var að lesa um Bögubósa áðan og lesa ýmislegt eftir þá sem mig beinlínis hryllti við. Í framhaldi af því varð þetta til;

-*-

Bræði mikil, bullar æði,
bæði dapur, leiður.
Fræði bragsins, falleg kvæði,
næði yrkja, heiður!

-*-

Örlítið í dýrari kantinum frá mér komið.

Eruð þið alveg hætt að kommenta? Skelfi ég ykkur með þessum afhjúpunum mínum? O sei sei...

Sjá'st.

Óveður

2006-02-25T17:08:00.000Z

-*-

Bylur vindur, boli næðir,
ber að utan, hávært slær.
Barnsins litla hjartað hræðir,
höggva, lemja gustir skæðir.

Lævís hvílir minning, mara,
mæðan kenndi eina nótt;
í rokinu, þá fjöllin fara,
fram þau leita, af því bara.

Ungann litla ógnin neyddi,
allt að missa, sættast við.
Barnið sá en aldrei eyddi,
engan plástur fékk á meiddi.

Ennþá getur óbilgjarni
úfinn kárinn hrætt og skelft.
Ungri konu, aftur barni,
illa svíður. Rok á hjarni.

-*-

Fuglaflensa

2006-02-25T00:38:00.000Z

Hafið þið nokkuð betra að gera en að lesa braghendu?

-*-

Fleginn var hann fuglinn dauði fjaðrahami.
Blóðið rann í breiðum taumi,
barnið fylgdist með í laumi.

-*-

Held ekki...

Röðlök

2006-02-24T00:40:00.000Z

Sagt er að fólk læri af mistökunum. Einnig er sagt að fólk læri af mistökum annarra. Ég ætla að deila hér með ykkur mistökum sem ég gerði í þeirri von að það verði til þess að forða ykkur frá því að gera þessi sömu mistök.

Fyrir alla muni ekki... ég ítreka EKKI nota rauðlauk í fiskibollur. Þær verða svo óhugnanlega og viðurstyggilega ljótar að það veldur velgju.

Kannski er ég örlítið að ýkja. Ég borðaði þær nú og þær brögðuðust fínt. En oj hvað þær voru ljótar. Ég læt mér þetta því að kenningu verða og vonandi þið líka.

Komdu að kveðast á

2006-02-23T13:28:00.000Z

Jæja góðan daginn.

Ég er að hugsa um að koma út úr skápnum. En bara sem kvæðamanneskja. Málið er að ég hef brennandi áhuga á margskonar skáldskap og hef eitthvað verið viðriðin þvíumlíkt í gegnum tíðina. Þó hef ég yfirleitt bara kveðist á mjög klúrlega í sms-um við hana Svansý, samkvæmt ströngustu reglum þó. Tók ég þó upp á því fyrir nokkru að hella mér í þetta af krafti og hef í huga að deila afrakstrinum með ykkur hérna, þó svo áhuginn verði ef til vill takmarkaður.

Í dag ætla ég að sýna ykkur afhendingar. Þetta er afskaplega skemmtilegur rímnaháttur sem má lesa nánar um hér. Hér koma svo mínar afhendingar sem eru ekkert tengdar sosem, bara þrjár stakar.

-*-
Lemur vindur, lætur illa. Löng er biðin.
Fiskimenn ei fara' á miðin.
-*-
Spói lítill spurði glaður, spáin betri?
Iðgrænt kemur undan vetri?
-*-
Afa minn ég man og finn að mömmu sakna.
Af ljúfum draumi' er leitt að vakna.
-*-

Vonandi hef ég ekki gengið frá ykkur með nördaskap.

Annars gengur lífið bara eins og það gengur. Fólk er hresst og þvíumlíkt.

Næturvísa

2006-02-22T02:10:00.000Z

Stundum gerist eitthvað í höfðinu á mér sem ég get ekki útskýrt og þá verður til eitthvað svona:

-
-
-
Vömbina ég sauma í og syrgi,
sannarlega ei í brjósti hlátur.
Innra með svo angistina byrgi,
Ömurlegt mér finnst að taka slátur.
-
-
-

Api hlær að eigin fyndni... og þarna hló ég að sjálfri mér.

O sei sei

2006-02-20T20:09:00.000Z

Your Personality Profile

You are elegant, withdrawn, and brilliant.

Your mind is a weapon, able to solve any puzzle.

You are also great at poking holes in arguments and common beliefs.

For you, comfort and calm are very important.

You tend to thrive on your own and shrug off most affection.

You prefer to protect your emotions and stay strong.

The World's Shortest Personality Test

Nombres officiels

2006-02-17T21:38:00.000Z

Jæja, opinberar tölur.

-4,8 kg. á 19 dögum. Ekki amalegt það.

Látum skyrtertuna fylgja með

Botn:
30 gr. melba toast
10 gr. klípa

Kexið mulið vel og brætt smjörið sett út í, sett í botn á skál eða formi.

Skyrkremið:
150 gr. vanilluskyr.is
50 gr. sýrður rjómi
karamelludropar
sætuefni
1 blað matarlím, bleytt og brætt í örbylgju.

Allt hrært vel saman og smakkað til. Sett yfir kexbotninn.

Ofan á.
100 gr. jarðarber (eða önnur ber)
1/2 dl heitt vatn
1 blað matarlím, bleytt og leyst upp í vatninu.

Öllu skellt í blandara og mixað mjög vel. Hellt yfir skyrkremið. Látið svo bíða í kæli í amk 1 klst. Þetta er hádegisskammtur af prótíni, 1 mjólkurskammtur og 1 ávöxtur.

Vesgú! (á góðri dönsku).

Sjá'st!

Úúíííúúú baunagrautur!

2006-02-16T16:28:00.000Z

Ég gerði alveg hreint ágætan baunarétt í gær. Hér kemur uppskriftin.

Baunarokk

170-220 gr. Pintobaunir og nýrnabaunir, hanteraðar eftir leiðbeiningum.

50 gr. tómatpuré
3 væn hvítlauksrif, söxuð fínt
2 rauðir chilipiprar, saxaðir fínt
Cayenne-pipar af hnífsoddi
ágætis klípa maldon salt
1 tsk soja sósa
ca. 1/2 dkl vatn

Þessu er öllu skellt saman í skál og baunirnar saman við. Látið marinerast í kæli í einhvern tíma. Ég geymdi þetta bara yfir nótt.

Zuccini
Paprika
Laukur
1 tsk. Tandoori Masala

Grænmetið saxað og svissað á pönnunni með kryddinu, tekið frá, mælt og vigtað eftir behag. Baunajukkinu er skellt á pönnuna og hitað vel, grænmetinu skellt sem snöggvast út á og blandað vel. Enjoy!

Ég þarf vart að taka fram að þetta er auðvitað alveg viðurstyggilega sterkt. Þeir sem ekki þola slíkt geta e.t.v. sleppt alveg chilipiparnum og notað bara smá cayenne-pipar. Svo má eflaust minnka hvítlaukinn ef þið hyggið á mikið kossaflens.

Sjá'st!

Kveldið

2006-02-14T23:19:00.000Z

Jæja, eitthvað hefur blogger verið tregur undanfarið, skyldi hafa orðið bót þar á? Sjáum til.

Annars gengur bara glimrandi vel. Danskurinn er alveg að gera sig og er bara alveg ljómandi gaman að þessu öllu saman. Ef áfram heldur sem horfir mun maður fara hverfandi allskjótt. Formlegar mínustölur verða enn að bíða sökum þess að ekki var flogið á síðasta föstudag og þar af leiðandi var enginn fundur. Ég ætla rétt að vona að það verði flogið núna á föstudaginn, annars líða aðrar tvær vikur í fund! Ég nenni ekki að bíða svo lengi! (Þó svo maður geri það auðvitað ef þess þarf).

Það hafa verið gerðar allnokkrar tilraunir í eldhúsinu, svona eins og mér er einni lagið, og hefur flest komið mjög vel út. Ég nenni samt ekki að skrifa inn einhverjar uppskriftalanglokur hérna ef þetta virkar svo ekki neitt! Læt nægja að setja inn þessa hér:

Rokkaðir kanel-ávextir.

1 epli
1 pera
10 gr. klípa
kanell
sætuefni

Brytjið ávextina og skellið í eldfast mót, bakið þar til mjúkt. Setjið svo smjörið, kanel og skvettu af sætuefni yfir og veltið um þar til smjörið er bráðnað. Þetta er alveg afbragðsgott og þá sérstaklega með vanilluís! Svo gerði ég þetta aftur, notaði þá tvö epli og eina peru og bakaði aðeins lengur. Þá voru eplin orðin að mauki og úr varð alveg ljómandi góður eplagrautur með perubitum í. Miklu betri en þessi dísæti þarna í fernunum. Einnig væri ráð að gera smá deigmulning yfir þetta og borða svo með vanilluís. Prófa það síðar.

Hvað segist annars? Eruði ekki hress?

Sjá'st!

Sjaldséðir hvítir... og svoleiðis.

2006-02-06T18:06:00.000Z

Jahahá. Það er aldeilis vanrækslan í manni... oseisei.

Sosem ekkert merkilegt að frétta, þannig séð.

Eitthvað hefur borið á því að fólk hér í bæ sem er að reyna að skipta um lífsstíl og gera góða hluti fyrir sig og líkama sinn hefur verið áreitt á bloggsíðum sínum. En ég hræki auðvitað í andlit hættunnar (svo maður þýði beint úr engilsaxnesku) og játa hér, með semingi þó, að ég er byrjuð á danska-kúrnum. Þetta er alveg að gera sig sko! Má borða fullt af góðum og hollum mat á hverjum degi og líður alveg ljómandi. Vigtin hefur auðvitað sigið niður á við þó formlegar tölur bíði til föstudags, en þá kemur DDV-ráðgjafinn í bæinn og verður með fund.

Ég er að byrja á viku númer 2 í dag. Var aðeins búin að kynna mér þetta áður og svona, en ég er enn að læra. Svo lengi lærir sem lifir. Ég finn það amk strax að þetta er eitthvað sem á 100% við mig. Það er ekkert svona "má ekki"... reyndar sleppir maður sykri en það er svo margt gott hægt að gera án sykurs og allskonar sætuefni og bragðefni í boði. Svo ef manni langar í köku eða eitthvað, þá bara safnar maður sér fyrir henni yfir vikuna og bakar svo köku úr því magni af hráefni sem leyfilegt er. Ekkert mál. Amk ekki fyrir mig.

Ég hef einnig ákveðið að láta áfengið vera þar til amk 10kg eru horfin. Dugleg, ekki satt? Það má sosem alveg fá sér í glas en það hægir á brennslunni og ég er ekki tilbúin að spilla fyrir svona alveg strax. Fór bláedrú á djammið á föstudagskvöldið og skemmti mér bara vel!

Ég leyfi ykkur að fylgjast með hvernig gengur.

Sjá'st!

Veeðð?

2006-01-13T08:01:00.000Z

Úr frétt BB:

"Foreldrafélag Sólborgar á Ísafirði gaf leikskólanum veglega gjöf í gær. Um er að ræða litasjónvarp og DVD spilara." http://www.bb.is/?PageID=141&NewsID=64432

Hverjum gæti dottið í hug að það væri eitthvað annað en LITAsjónvarp?

Gerið skyldu ykkar!

2006-01-11T15:59:00.000Z

Niður með DV í núverandi mynd.

Haaa...

2006-01-05T22:09:00.000Z

Humm haaaa

Hvurnig virkar svo þetta drasl?

Jæja

2005-09-21T10:18:00.000Z

Ætlar maður að færa sig hingað yfir?